Kolkata Bus-ah

Kolkataah thla khat pawh ka awm hmain bus mahniin ka chuang a, a route hi dang nuaih mahse ka kaltumna lam a ni em tih ka zawt pawp a, ka chuang ve tawp a, ka bo bik em chuang lo, Vairamah chuan hmeichhe thutna leh Senior Citizen bik thutna a awm hrang a, thutna dang awm loin hmeichhe thutna leh upa ho thutna chu awl reng mah se an thu mai mai ngai lo a, tumkhat chu Driver opposite chiah hi a lo awl a, ka thu ve hmak a, Ladies Only tih a inziah ve loh avang leh Pakhat alo thut ve tho avang chuan ka thu ve mai a, kan kal zel a, hmeichhia an lo luh belh zel a, ka thutpui pa chu a tho daih a, hmeichhia alo thu a, hmeichhe thutna tur tih ka hre mai bik lo a, ka la thu reng a, thutna zawng zawng a full vek tawh a, ding pawh an awm teuh a, kei lah thutna inla chang fuh em em leh ti fuh inti em emin ka thu a, a hnu deuh bus stand ah chuan hmeichhe la tleirawl deuh pakhat hi a rawn lut a, hmeichhe thutna tur a nih kha khawi ka thu dawn a rawn ti ta mai. Mahni chiah mizo nih bawk bakah ka la awm rei lo si a, chinchang ka la hre lo bawk si nen ka thin chu rim rilru ang reng khawp mai a, inhnawhchhuah tawp mai chu, muang tawkin ngeiawm ve hrim hrim ang ti rilruin kan tho a nih kha, zahthlak ve tho mah se tih vak ngaihna awm lo a, thawh mai kha ka tihtur chu ni reng a, mahse muang tawkin kan thawh ve kha, ka tih ve theih tawk kha ni miau a.

Tumkhat pawh ka thianpa te hostel ka tlawh a, zanah ka haw a, Auto-a haw tumin ka chang a, avangin chang an lo tam em em mai a, auto ka chan lai chuan bus a lokal fuh hlauh avangin ka chuang ta zawk a, a tawt kher mai, bag ka ak bawk si. Thil tihbo hlau bawk si nen ka inveng ru deuh reng a, hetah pawh hian an tihdan ka lo hre lo leh pek a, din dan a lo awm thlap chu niin, mipa chuan mipa lam hawi tur a ni a, hmeichhia chuan hmeichhe lam thutna kha hawi tur a ni a, kei lah engmah hre hek lo, Mizo ho bus chuan danin a ngil pheiin a vawn chhan leh lam lehlam vuanin ka ding a, a hnuah achep deuh avangin hmeichhe lam ka la hawi ang deuh deuh a, min en hrek hrek a, kei lah engmah hre thiam hek lo le, chuan stand ah hmeichhia an lo luh belh a, min rawn nek deuh salh salh a, min cho ve hlein ka hria, an inti thu em em a, ka dinna chu min lan deuh ti tih nghal der a, kan hawi chian chuan mipa ho chu a chhak lam an lo hawi vek chu niin hmeichhia lah a thlang lam an lo hawi vek a, chuta tang chuan tuma hrilh lem loh chuan ka hrethiam ve tawp a, ni turah ka ngai ve tawp a, tunah pawh hian chuti ang tur chuan ka pawm ve hmiah tawh bawk.

 Hemi zan hian ka chuanna chu kan hostel bul thleng kal tur emaw ka tih kha alo ni lo niin kan hostel lo lamah chuan a peng a, keilah kawng ka la bel lo bawk nen ka kal dik lo deuh chuan ka hria a, mahse kan hostel thleng tura ka ngaih avangin ka ngaihtha lo chung chung chuan ka ngaih chu ka ti tha chawp a, kan hostel thlen tepah kan lo peng daih chu niin ka chhuk har deuh chu conductor chuan min rawn bia a,  ka hrethiam kim bawk si lo, mahse kawng kan han en vang vang chuan niin ka hre tawh lo a, bus chu ka din tir a, ka chhuk ta ngawt a, ka kal dik lo tih ka hre nghal a, heta ka bo chhan hi Jadavpur ka ti a, conductor lah khan Jadavpur thana thleng kan kal dawn a lo ti kha a lo ni a, keilah chuan chulai hre hek lo i,  kan thleng tho turah ka ngai a, ka chuang ve tawp kha nia, jadavpur thana atang chuan South City Mall lamah kan lo peng daih a, ka chhuk hnu chuan ka mangang rilru deuh hlek a, dar 7 vel ni tawh a, kein kan kalna ngaiah chuan ka phei risk tawp a, vanneih thlak takin kan class a mi ka hmu hlauh mai a, an ni haw tur nen chuan kan intawk a, kawng ka zawt a, tluang tak chuan ka thleng ve leh ta a ni.

Vawikhat chu tlaiah thim tawhah hian kan thianho hian South City Mall kal ang u kan ti a, SA boys hostel atang chuan kan kal a, Park Circus atangin bus-ah kan chuang a, hetah pawh hian atirah chuan kan ding a, a hnu deuhah hmeichhe lam thutna a awl a, tumah thu tur an awm lo bawk a tiin kan thu ve a, kan thian dun chuan kan thu dun ran mai a, hmeichhia an lo luh pawhin tho leh mai tur chuan kan inring reng a, chutah tlar hma bera thu hmeichhe pakhat chu rawn kal nal nal in kan thutna takah chuan rawn thut a tum tlat pek a, kan ngam leh lo chu ni phawt mai. A ngeiawm duh ngei mai, tlat hma berah khan a thu reng a, engemaw kan thutna kherah khan a rawn thut kher ni aw. Ka thianpa nen chuan phun nung nungin kan ding leh ta a, mizotawng chuan kan phun kan phun a, kan hmelah chuan ka lawm vak bik lo tih a hria ni ang chu hmeichhe seat hnung bera amah chiaha thu nu pakhat la upa vak lo hian min rawn en vang vang pah hian hetah hian lo thu rawh a ti ta mai a, mak ka ti a sin aw, keichuan ka lawm e, ngai lo mai ka ti a, ani chuan a pawi hleinem lo thu rawh a ti a, mahse ka thuduh bik ta lem lo a, lawmthu te ka hrilh a, ngai love te kan ti ve a, khanu kha avan fel tak e aw, vainuah chuan fel ve tak a ni ka ti, amah bula thu tur leh nghalin khati khan min sawm ngat kha nia, ka awih lo hial zawk a ni. Vai hmeichhe ho inlak zia leh keini ang hmel min hmuh a engahmah min ngaih lo zia ngaihtuah chuan mak tak a ni. Thenkhat kawng tawt deuha innek palh pawh a, kan insikna lai tuai fai tawk an awm lain ani kha vai berh tak chu a ni lo a, a hmel pawh a changkang thawkhat a, hausa tak chu ni kher lo ang. Bus a chuangah chuan mahse rethei berh tak chu a ni lo tih ahmel leh a incheidanah a chiang a, khatia min sawm kha chu mak ka la ti tawp thei lo a ni.