Mahni insitna

Mahni insitna kan tih hi mi hringnuna bet tlat, pachhia leh chan hai, hausa thil ti thei zawk te pawhin kan nei theuh a ni awm e. Amaherawhchu kan neih dan leh kan laknat dan te, kan tawrh dan te, kan hmachhawn dan te erawhchu a in ang vek lo a, mi zawng zawng tawrh ni mahse tuar thiam tan chuan hnen theih mai a ni a, hneh hlen erawhchu a har deuh mai thei, chutih lai chuan tuar thiam lo tan chuan chhiat rawkna a ni ve bawk si a ni. Mahni insitna hian mihring nun chu engti ang takin nge a nghawng le?

            Mahni insitna hi mihring dinhmun a zirin kan insit dan adang thei a, mahse kan tuar vek si a ni. Heti ang thil tawk lo hi an awm ka ring lo a, an lo awm ngai anih chuan mi vanneih ber an ni awm e. Engvangin nge mahni chu kan insit em em a, a chhan bulpui ber pakhat chu kan dinhmun vang a ni ber awm e.

Retheihna vangin mahni insitna hi a awm duh hle awm e, rethei kan han tih hian khawvel sum leh pai lam a rethei bik hi lo thlur bing ta ila, mihausa tan chuan nun kawng zawh hi a nuam em em a, retheih chuan rual pawl a har a, sum leh pai hian thil a ti thei nasa mai si a, “sum ngah ngah hmeltha” tih thu te thlengin kan neih atang hian rethei dinhmun hi chu a chiang viau a ni.

He khawvelah chhungkaw rethei atang a lo pian chuan nunin rual a awt em em a, zirna thaah kal a theih lo nghal phawt a, naupan lai chuan naupang nun kha hmalam hun tur a thlir thiam loh avangin lungngaihna chang a hre lo a,a hlim em em tho thin. Mahse zirna thaa kal loh pawizia chu pawlte lo sawn a, lo upat deuh hnuah hian a chiangin chu chuan zirnaah tui lohna a thlen a, Pawl sang lo teah bansan a awl phah hle a ni. Bansan lova ti lui tang tang a,pawl te pawh sawn ve beuh beuh tan pawh, hun hmalama zirna khan a lo ken tel tawh loh saptawng thiam tawk lohna te kha nun ti hnualtu a ni fo thin.

Mizo sikul a lut te hi chu pawlsang an zir thleng hian an buai leh deuh nge nge thin. Chuti ang nun neih chuan zirnaah a ti tui lova, thiante zirna tha tak tak a lo kal te nen pawl khatah a thu ho lo thei si lo, mahni aia thiam lo leh hre lo zawk te hi chung en a ngaih fo chang a awm thin. Mizo te hian saptawng a thil sawi thei deuh hi chu kan ngaisang em em mai bawk si a, hre ve tho tawng theih loh vangte, tihsual hlauhna avang te hian nun hi a chep em em awm e, chu chuan inkiltawihna nunah nasa takin a tlen thei a, rual pawl chak lohna thlengin nun chu a ti tawt thin. Heti ang thil hi mi zawng zawngah a thleng kher lo mai thei. Hneh tum tlat a paukhau tan chuan hnen theih a ni ngei mai. Mahse hneh thei ve lo an awm a, chuti ang tan chuan dinchhuah hi a har thin a, mahni insitna chuan an mahni a vaw chau a, thil tihah tui lohna an nei phah thin a, thil hmachhawn ngam lohna an ngah duh em em a ni. Heng kan sawi tak lo awm chhan bulpui ber pakhat chu retheihna vang kan ti thei ang.

Retheihna vang hian rualpawl chaklohna a awm thei, mi pangngai engkim hre thiam, hmeltha leh hmelchhia, thil hlu leh hlu lo, thil tha leh tha lo hre vek si mahse chhungkaw dinhmunin a zir miau loh chuan thenrual kawm a, intihhlim te chu chak ve viau mahse an chhungkaw dinhmun leh an nihna chu anmahniah an inhriat reng avangin rual pawl lohah te an tlak a, mahnia awm nuam ti angin lang mahse mahnia awm kha nuam an ti em em a ni lo, thenrual pawl a, intihhlimte chu an chak ve a lawm, mahse an dinhmun an inthlir hian rualpawl theiin an inhre ve tlat lo a ni. Thian siam lohah te an tlak thin. Ngaihzawng neih chungchangah pawh a ni vek tho awm e. Chhungkaw dinhmun hre ran chung chuan ngaihzawng duh ang tak neih hi a har thin viau reng a ni.

Pawngsual te hi insitna vangin a awm thei hle awm e. Pawngsual huat loh vang ni loin a chhan te hi kan chhut ve thin a ngai hle a ni. Pawngsual tam tak lo awm chhan hi a inang lo ngei ang, thenkhat chu an hur vang leh an sual hrim hrim vangin he thil hi an thlen tih kan hria a, mahse mi a retheih si a, a nunah insitna atamin a nula duh zawng an nei ve thei si lo, sum ngah deuh hmelah pawh hmeltha leh hleitling pawh ni bik loin an sum neih hmachhuan a, nula duh duh an han kawp lawr thin hi mipangngai chuan an hre ve thiam vek mai si a, insum zo bik lo tan chuan hun rem chang hmuh a chet ve mai hi thil awm tak pawh a ni ve thei hle a ni.

Mahni insitna avang hian nunna hial chan a, mahni nunna la ta hi engzat tak awm ang maw, kan pian phung, kan khawsak danin a zir miau loh chuan kan tan dinchhuah a har em em a, a zei lo chi tan phei chuan nun hi atawpin kal zel dan tur hi hriat a har em em a, mahni insitna chuan mahni inkhawngaihna nunah a lo tuh thuai thin avangin mahni nunna hial lak duhna a lo thlen thei hle dawn hian a hriat. Mahni nunna la ta mai te hi kan dem ngawt tur a ni lo, an harsatna tawh kha an do zo lo a, an hneh nang lo a, an harsatna tawh chuan a hneh avangin an nunna hialin a lo tuar phah thin a ni. An mahniah Pathian thlamuanna an neih loh phei chuan dem ngawt ngawt hi thil har tak a ni. Mahni insitna leh mahni inkhawngaihna hnehna tha tak chu Pathian atang hian a ni si a.

Mahni insitna hian mihring nunah hian harsatna ngawt hi a lo thlen reng reng lo tih kan hriat erawh a tul hle awm e, mi huaisen leh paukhauh te chuan an retheihna te, an pachhiatna te chu inhneh tir loin chakna atan an hmang a, a hunlaiin hreawmin insit em em mahse rilru an siam a, an harsatna chu chaknaah hmang tangkaiin, chhelna hi hlawhtlinna a ni tih hriain insit chung chungin an bei a, tuna an beihna hi nakin a an nawmna tur a ni tih hriain chau thelh thelh thin mahse an insitna chuan a fuih a, an hmalam hun hre ranin an tun hun an hmang a, hlawhtlinna an lo neih theih phah thin a ni. Mahni insitna inhneh tir thin chu an tlu chhia a, mi nuihzat leh mi hmuhsitah bawk an awm kumkhua thin a ni.

Mihring nun englai pawhin inring tawk takin a kal reng thei lo a thil tawn leh hmachhawn azirin mahni inrintawkna a hlauh a, mahni insitna ruamah a hnuk lut thin, mahse chuti ang hun harsa lai tak, mahni insit ngawih ngawihna ruam thuk atang chuan mi puitling chu a ding chhuak leh a, he hringnuna bet tlat mahni insitna pawh hi atan hneh alo awl thin. Mahse kan sawi tawh angin mihringah mahni insitna nun neih tawh chuan kan dinhmun leh kan nihna te lo tha deuh tawh mahse chhunglamah hian insit rukna hi a awm reng thin a, mahse chu chu mi puitling chuan a tilang lo a, mite ngaihsan leh fak an lo ni zawk thin a ni.