Mizo Footballer te nen

Lehkha zir turin Kolkataah july 2012 khan ka chhuk a. Lehkha zir piah lamah ka chhuk hmaa ka lo tum thin chu Cricket stadium ngei mai a Cricket khel en te, I league match salt lake stadium ngei a en te leh Mohun Bagan leh East Bengal inkhel (Derby) ngei mai en te leh a dang dang pawh a la ni a, Kolkata hi India football inpui an lo tih thin ang ngeiin ka chhuk tira ka hmuh tam chu khawlai leh kawngpui vela naupang leh thalai deuh football pet a ni reng a, ka lo rin dan chuan football tuipui viau mahse Cricket tho tho a lar ka lo ring a, india ram hmundang nen chuan a in ang lo hle in ka hria. Cricket hi ka lo tui zawkna leh ka khelh ve thin a nih vangin Cricket stadium ngei mai a, Cricket en hi ka tum em em a ni a, mahse football pawh hi khel chiah lo mah ila, kan mizo pui te inkhel leh an chanchin te, sap lam inkhel te pawh a en leh an chanchin chhiar leh hmuh te hi chu nuam ka tiin ka theih ang tawk tawk chuan k lo bih ve thin tho a ni.

            Internet kal tlangin Football news leh thil chi hrang hrang te ka en in ka chhiar deuh reng thin a, abik takin Zofooty Website hi ka tlawh deuh ngei ngei thin. Mizo footballer chanchin an lo ziah phei hi chuan ka chhiar chhuak deuh ziah bawk thin a, Sap ho hi chu ka tuipui tak te an nih loh chuan chhiar tha peih lo zawk a, Chuti ang a, an chanchin kan lo chhiar thin kan Mizo inkhel thiam te ngei mai chu a nungchungin inkhawmnaah te kan han hmu chho a, a tirah chuan kan hmu ringawt pawh chu ka inti thei thei hle a, chhung rilah hian a lo nuam veng veng mai thin a ni.

            Kan inkhel thiam te hi ka chuan em emna chu Mizo thil tih velah leh inkhawm te hi an ngaipawimawh em em a, an mahni an in la engemaw lo a, tupawh mai hi thian angin an kawm vek a, an nel awm em em bawk mai a, keini ni ve ta ila, awmdan chin tawk hriat har ngawt hian ka ring a lawm le. Mi tam tak kan tih lungawih loh ngei pawh ka ring, anni  chu an ni ve lo a, thian inkawm ang tak hian mi an kawm thei nghal zel hi an va fakawm em!!!

            Thla tam la awm lo mah ila, thiante kal tlangin Rinfela a ni hi Mohun Bagan a khel mek, 2012 Santosh a, Mizoram captain kha a ni, chu kan inhmel hriat hlauh mai a, a ni pawh hi a fel khawp mai, kan awmnaah te lo leng thinin kan innel chho tak zel a, a ni hi Rozama nen an club neitu ten in an luahsakah an cheng duh a, Motor te an dawng a, 1^st team regular la chang chiah lo mahse an hlawh pawh achhe lo niin a lang (ka hre bik chiah lo).

            Chutia inhre chho zel chuan kan lo innel chho ta zel a, kan awmnaah te chaw te lo ei vein rawn leng ve thin a, a changing an motorah chuan Sunday tlai kan fellowship bang pawh kan haw ve theih phah ta hial a, inchhuang ru ve hle. Anni ngaihah chuan engah vak an ngai lo mai thei, mahse a hlu ve em a ni. Anmahni vek chuan Sunday inkhawm kan kal thin dan te min zawt a, taxi a kan kal thin thu leh inkhawmna a hlat thu te kan sawi a, anni chuan induh phawt te chuan kan rualin inlo kal ziah dawn nia. Kan 2 chiah hian lawm kan kal thin an han ti a, lawmawm duh veng veng tak a ni. Kan awmna pawh  alo inhlat lo em em mai leh nghal a, kein lo kal phak reng chu niin.

            Ni 28 October 2012 Sunday chu an rual chuan kan inkhawm ve ta ngei reng a, an nelawmin an fel em em a, anmahni vangin pawisa tam tak kan save nghal phawt a, inchhuan ve tawh teh reng nen hlawkna kan lo tel ve reng a lo ni a, Rozama’n Motor khalhin Rinfela te nen ka thianpa pakhat nen kan pa thumin a hnungah kan thu a, a hmaah kan thiannu pakhat a tel bawk a, car tape te chu play in kan zai ho dial dial a, nuam ve duh viau a, ngaihtuah hian a lawmawm ve veng veng thin.

            Inkhawmnaah chuan Mama te nupa te pawh an rawn inkhawm a, footballer dang te pawh an awm leh zauh thin. Inkhawm banah hian Mizoram House-ah Fellowship Thalaiin kan nei leh thin a, chumi hmang tur chuan kan inkhawmna hmun atang chuan kan kal leh thin a, fellowship chu ka tan hun a ni a, sharing hun kan hmang dawn a, ka phur hle, ka phur chhan tak pakhat chu Robert Lalthlamuana (East Bengal) in sharing hun a hman dawn vang a ni. Keichu mi tumruh leh hlawhtling te sharing ngaihthlak hi hlawk thlak ka tiin ngaihthlak nuam ka ti thin reng a, ka rin ang leh ka lo ngaihthlak chak ang ngei chuan Robert-a chuan a football khelh chho dan leh alo beih nasat ve thin thu te, a beidawn lek lek thu te a sawi a, chutah chuan Pathian hnaih a pawimawh zia a sawi kai a, amah ngei pawh chu sum  te pawh lo nei ve deuh tawhin Pathian chu alo hlat lek lek hman thu te a sawi a, a khai khawm nan a, Pathian kan hriat reng a, kan tih tlat a pawimawh thu a sawi te kha a tha ka va ti em. Kan Fellowship-ah hian Jeje Lalpekhlua (India Striker) chu a rawn tel ve a, a ni hi Pune FC a khel a ni a, a tuk thawhtanni a Robert leh Didika te nen inkhel tura rawn kal an ni a, hemi ni kher kher hi chu kan footballer ah chuan kan phuisui khawp mai. Sharing duh duh sawi hunah lah Footballer tho Didina (ani hi chu 2^nd div club a khel niin ka hria) in thu tha tak mai thalai te chona tha tak mai rawn share bawk a, hlawk thlak hle a ni.

Kan ban dawn lamah chuan ka rilruah thil pakhat lo lang ta tlat mai. Chu chu Dr. Laltluangliana Khiangte (Pu Tluangtea nikum lama kan Sir thin, tuna Serampore university Principal ni mek) an a sawi hi a ni. Mi hmingtha leh lar ngaihsan tlak te hi chu Chibai zel rawh u, a theih phei chuan thla lakpui ngei ngei tur a tih hi ka rilruah lo lang ta a, kan footballer te chu banah thla ka lakpui ang tiin ka rilru ka siam nghal a, ka thianpa camera ka kawl lai lo ni hlauh bawk nen remchang khawp mai. Ban velah chuan House pawn lamah chuan kan chhuak a, chutah chuan thlalakpui ngei ka duh avangin camera chu ka thianpa pein footballer ho thla ka lakpui duh a, min lo hmehsak ka ti ta a, anni ho pawh chu an lo fel khawp a, anmahni bil bik lak ve hrim2 an duh vang leh magazine lama mi tur an duh vang chuan an han la phawt a, chumi hnuah chuan ka va inrawlh ve ta nghal vat a, kan thianpa pakhat lo inrawlh ve nen kan lakpui thei ta  ni. Ava nuam em!!!!!! Ka inchhuang tak zet zet a ni. Thlalakpui hi ka lo phur lutuk vang nge maw ni ka Bible chu kan fellowshipnaah ka lo theihnghilh daih a, ka hre chhuak a, ka han la leh a, ka thianpa hian min la fiam phah zui. I footballer thlalakpui chak lutukin I Bible pawh I hre tawh nange a la ti zui. Mahse Bible chu ka theihnghilh hmin der chuang lo..haha

Chu mai ala ni tlat lo, pawna kan thut khaw muan hnu chuan haw tumin gate pawn lam chu kan pan phei a, chutah chuan kan kalna lama kan chuanna ni loah khan kan chuan angai ta tlat mai. Kan kalna lama kan chuanna Rinfela leh Rozama te motor kha chuan Rozama’n Jeje-a an thlah a, keini chu Roberta motor ah chuan kan chuang ve ta a ni. A hnungah ka thianpa leh kei, Didika, rinfela te kan thu a, Roberta’n motor khalhin a hmaah kan thiannu a chuang bawk a, hetah tak hian lawm inthlahrunawm tehreng nen, a hnungah tawt chung chungin kan inhnawh a, mahse an va fel em, Didika pawh ngawi chawi deuh tura ka lo ngaih kha a lo tawng duh ve khawp mai. An fel lutuk tlat. Chuan kan awmna pengah kan chhuk a, rinfela chu a thianpa Rozama’n an inchahbi a lo ken daih avangin kan awmnaah lo leng nghal a ni.

Chumi zan rei tawh takah chuan Pune Fc leh East Bengal inkhel tur kha ka ngaihtuah chiang a, en ka chak ta tlat mai. Ka thianpa ka sawm ta a, internet lamah chuan a hun tur te kan han en chuan a tuk dar 2:30 pm lo ni a, en ngei ang tiin thu thlukna kan siam a, tlai tawh viau mah se thian dang te chu sms chuan kan sawm chhin a, duh pawh an awm nual a, mahse a hun an lo neih hlawm avangin ka thianpa 2 leh kei chuan en tum chiang chuan kan mu ta a ni.

            (peih chuan inkhel en chanchin ziak leh ang...)